Genesis 7
Non namandran irayah
1PwenYapan ipwai iyata Nowah ipa, “Yo unime wou opu ata hiyan pe imwonen iya mwelenga hu ndramat masih para kol pwan. Pwen pe awiri wawu hapat o pe akaya kene nondriya ndroi. 2Pe awiri hu kan para kaniyai —- manandrtimou kamai pe manandrtimou pihin. Pe yihu kan nepo konoho yan pwi ara awiri malmou —- hamou kamai pe hamou pihin. 3Pe hu norukan ara tehen aliy yi; awiri hu manandrtimou kamai pe manandrtimou pihin, para hu kapo noruhu paiwe koro kol pwan. 4Kiro lang manandrtoyoh andre kuiki mbulou kindrut kisa pwan. Pe andre kindrut kiya manne lang mahaangui pe ping mahaangui. Tehen torako andre kupwasili topwe memelit masih makunuwe hu iripo kol pwan nepo umangsani hu.”5Pwen Nowah imbusi melit masih teheYapan ipwatisingiy iyatan.
6Iro tandrohonga mbulou indrut isa kol pwan, Nowah ara hayou tan iho mannongat (600). 7Nowah iyapolo nambuyun, norun hu pe mbuyu ngundran hu, yihu masikene huya nondriya ndroi, paratesah, non pakeh nakirah. 8Hu kan para kaniyai pe hu kan para kaniyai pwi, iyasura hu kan masih para seselek pe norukan nepo para wohowoh, 9ara hu masikene kamai pe pihin huya kili Nowah pe huya nondriya ndroi, tehe Ngindrai ipwatisingiy kinna tan. 10Pwen lang manandrtoyoh ara ihipwen, pwen non irah kol pwan.
11Nowah hayou tan iro mannongat (600), pe iro mwonen lang songui pe andrtoyoh para walah maluwoh, pwen pwan iramburing pe ndran isuw pe irambumbusau pe ingas isa ndrita pwan, pe mbulou indrut ikas iro paingan yang pe isa kol pwan masih. 12Mbulou irondrut, irondrut, irondrut ipoo lang mahaangui pe ping mahaangui.
13Pe iro mwonen lang nepo mbulou indrut, Nowah, nambuyun pe norun hu matimou Sem, Ham, pe Yapet, iyasura nambuyu hu, huya nondriya ndroi. 14Pe hu kan para wum pe hu kan puyap para yangiy, pe hu kan para seselek iyasura hu norukan masikene huya nondriya ndroi. 15Hamou kamai pe hamou pihin para kan handra-handra pe norukan handra-handra hu memelit masikene makunuwehu ara husa kili Nowah pe huya nondriya ndroi. 16Hu kan masikene, hamou kamai pe hamou pihin, huya nondriya ndroi tehe Ngindrai ipwatisingiy iyata Nowah, pwen peYapan iwari papai.
17Non irotah, irotah ipo lang mahaangui, pe non ingas pe irasumuluwani kol pwan pe ihiri ndroi iho hin ndrita pwan. 18Non irah iya namandran iya iro kol pwan, pe ndroi ara iho raipit ndrita non. 19Non ingas iya paingan masih, pe iramburuhi hu ngondron namandran masikene para kol pwan. 20Irah pe ingas iya paingan masih pe irasumuluwani hu ngondron topwei. Pe ndrohonga ngondron pe ndrita non ara pakeh mahaangah. ▼ 21Melit masih makunuwehu iripo kol pwan hu kanmat topwei —- hu norukan masih, hu kan namandran pe mendreheh masih para wum pe para yangiy, iyapolo hu ndramat masih, ara hu masikene hu kanhipwen topwei. 22Melit masih tora hiringoha hu iyau ngara ndrohonguhu ara hu kanmat topwei. 23PeYapan ipwasili topwe memelit masih makunuwehu iro kol pwan —- hu ndramat pe hu kan masih, hu kan para seselek pe hu norukan masih. Hapeko Nowah iyapolo hu masikene huro nondriya ndroi ara mwale hu.
24Pe non ara kintamat pwi ipo iya lang sangat pe yimingui (150).
Copyright information for
NSS